ഫുട്ബോള് ലോകം ഇന്നേവരെ സാക്ഷ്യം വഹിച്ചതില് വെച്ച് ഏറ്റവും വികാരനിര്ഭരവും നാടകീയവുമായ ഒരു മത്സരത്തിനൊടുവിലാണ് അര്ജന്റീന ക്വാര്ട്ടര് ഫൈനലിലേക്ക് യോഗ്യത നേടിയത്. ഈജിപ്തിനെതിരായ പ്രീ ക്വാര്ട്ടര് പോരാട്ടത്തില് ഒന്നിനെതിരെ രണ്ട് ഗോളുകള്ക്ക് പിന്നില് നിന്ന ശേഷം, 3-2 എന്ന സ്കോറിനാണ് അര്ജന്റീന മാന്ത്രിക തിരിച്ചുവരവ് നടത്തിയത്. ഇതിഹാസ താരം ലയണല് മെസ്സിയുടെ കണ്ണീരും നഷ്ടപ്പെട്ട പെനാല്ട്ടിയും ഒടുവില് അതിജീവനത്തിന്റെ വിജയമായി മാറി ജയവും ഫുട്ബോള് പ്രേമികളെ ത്രസിപ്പിക്കുകയാണ്.
ഈജിപ്തിന്റെ കടുത്ത പ്രതിരോധവും പ്രത്യാക്രമണങ്ങളും അര്ജന്റീനയെ ഞെട്ടിച്ചിരുന്നു. കളിയുടെ നിര്ണായക ഘട്ടത്തില് അര്ജന്റീനയ്ക്ക് അനുകൂലമായി ലഭിച്ച പെനാല്ട്ടി കിക്ക് എടുത്ത ലയണല് മെസ്സിക്ക് പിഴച്ചു. മെസ്സിയുടെ ഷോട്ട് ഈജിപ്ഷ്യന് ഗോള്കീപ്പര് തടുത്തതോടെ താരം കടുത്ത നിരാശയിലായി. ലോകമെമ്പാടുമുള്ള ദശലക്ഷക്കണക്കിന് ആരാധകര് നിശബ്ദമായ നിമിഷമായിരുന്നു അത്. ഒരുപക്ഷേ മെസ്സിയുടെ അവസാന ലോകകപ്പിലെ ഏറ്റവും ദൗര്ഭാഗ്യകരമായ നിമിഷവും അതായിരുന്നു, അര്ജന്റീന പുറത്തായിരുന്നെങ്കില്.പക്ഷെ, ക്യാപ്റ്റന്റെ കണ്ണീര് കണ്ട് തളരാന് അര്ജന്റീനന് നിര തയ്യാറല്ലായിരുന്നു. പിന്നീട് കളിയില് കണ്ടത് അര്ജന്റീനയുടെ അവിശ്വസനീയമായ ഉയിര്ത്തെഴുന്നേല്പ്പായിരുന്നു. മത്സരത്തിന്റെ അവസാന മിനിറ്റുകളില് ആക്രമണം കടുപ്പിച്ച അര്ജന്റീനയ്ക്കായി മെസ്സിയും ജൂലിയന് അല്വാരസും ഒടുവില് എന്സോ ഫെര്ണാണ്ടസും ഗോളുകള് കണ്ടെത്തി. തോല്വിയുടെ വക്കില് നിന്ന് മത്സരത്തെ 3-2 എന്ന സ്കോറിലേക്ക് മാറ്റിമറിച്ചാണ് ലാറ്റിനമേരിക്കന് കരുത്തന്മാര് വിജയം പിടിച്ചെടുത്തത്. 'പെനാല്റ്റി നഷ്ടപ്പെടുത്തിയതില് എനിക്ക് കടുത്ത ദേഷ്യവും വിഷമവുമുണ്ടായിരുന്നു. ഒരു നിര്ണായക നിമിഷത്തില് ഞാന് ടീമിനെ ചതിച്ചതുപോലെ തോന്നി. എന്നാല് ദൈവം എനിക്കായി അവസാനം എന്തോ പ്രത്യേകമായി കാത്തുവെച്ചിട്ടുണ്ടായിരുന്നു. ഇതൊരു വലിയ ആശ്വാസമാണ്. ഈ ലോകകപ്പ് യാത്ര പ്രീക്വാര്ട്ടറില് അവസാനിക്കാന് ഞങ്ങള് ആഗ്രഹിച്ചിരുന്നില്ല, അത്ര പെട്ടെന്ന് വീട്ടിലേക്ക് മടങ്ങാനും ഞങ്ങള് ഉദ്ദേശിച്ചിരുന്നില്ല.' -മെസ്സി പറഞ്ഞു.
ഫൈനല് വിസില് മുഴങ്ങിയതിന് പിന്നാലെ നിരാശയുടെ കണ്ണീര് തുടച്ച് മെസ്സി തന്റെ സഹതാരങ്ങളെ കെട്ടിപ്പിടിച്ച് വിജയം ആഘോഷിച്ചു. ഒരു വലിയ ദുരന്തത്തില് കലാശിക്കുമായിരുന്ന മത്സരത്തെ പോരാട്ടവീര്യം കൊണ്ട് അര്ജന്റീന മാറ്റിമറിക്കുകയായിരുന്നു. വരാനിരിക്കുന്ന ക്വാര്ട്ടര് ഫൈനല് മത്സരങ്ങള്ക്ക് മുന്നോടിയായി ഈ ആവേശ ജയം ടീമിന്റെ ആത്മവിശ്വാസം ഉയര്ത്തും എന്നതില് സംശയമില്ല.
content highlights: Messi's tears after missed penalty; A magical comeback and history written by the legend!